Deportes | Deputación

As axudas da Deputación da Coruña chegan a todas as entidades que solicitaron apoio e sumaranse a unha nova convocatoria municipal prevista para este ano

Os clubs deportivos de Culleredo recibirán 78.656,92 euros a través dos programas de subvencións da Deputación da Coruña destinados á promoción do deporte. As achegas benefician a todas as entidades do municipio que presentaron solicitude nesta liña de apoio impulsada pola institución provincial.

As axudas permitirán reforzar a actividade de disciplinas con ampla presenza no concello, como o baloncesto, o fútbol, a natación ou o atletismo, pero tamén doutras modalidades como a natación sincronizada, o motor ou a loita.

A Deputación acaba de resolver dúas convocatorias. A primeira está dirixida a clubs con equipos ou deportistas que participan este ano en competicións federadas de ámbito nacional ou internacional. Nesta liña, o Club Baloncesto Culleredo recibirá 27.761,23 euros; Gallaecia Raid, 5.761,23 euros; Yacar Racing, 5.761,23 euros; Culleredo Karting Team, 5.761,23 euros; e No Sport Limit, 4.480 euros.

A segunda convocatoria céntrase en entidades con equipos ou deportistas que compiten en categorías federadas de ámbito local, provincial ou autonómico durante 2026. Neste caso, as axudas serán para Sporting Burgo, con 4.500 euros; Portazgo SD, con 4.500 euros; UDJ Almeiras, con 4.500 euros; Olímpico de Rutis, con 4.500 euros; Club Natación Culleredo, con 4.500 euros; Club Aguamarina Sincro, con 3.752 euros; e Club Joker Grappling Jiu Jitsu e MMA, con 2.880 euros.

Esta achega provincial súmase aos 200.000 euros concedidos polo Concello de Culleredo para actividades deportivas nos dous últimos anos. O goberno local avanzou que este exercicio aprobará unha nova convocatoria municipal co obxectivo de manter o respaldo ás entidades deportivas.

O alcalde, José Ramón Rioboo, destacou que o Concello quere 'seguir apoiando a actividade esencial dos clubs, co deporte como vehículo de cohesión social'.

As subvencións permitirán ás entidades afrontar gastos habituais da tempada. No caso dos equipos que compiten fóra de Galicia, os fondos poderán destinarse a desprazamentos, aloxamentos, servizos médicos especializados e seguros de responsabilidade civil.