Máis de 450 sinaturas presionan para suavizar as restricións ao tráfico no casco histórico
O debate sobre a mobilidade no casco histórico de Betanzos suma un novo capítulo. O Grupo Municipal do PP rexistrou unha alegación colectiva apoiada por máis de 450 sinaturas para pedir cambios na ordenanza coa que o goberno local pretende limitar o tráfico rodado na zona vella, unha norma concebida para priorizar o uso peonil, restrinxir accesos e controlar a circulación mediante un sistema de 12 cámaras.
A portavoz popular, Ceci Vázquez, sostén que o volume de apoios reflicte un rexeitamento social importante á redacción actual da norma, especialmente entre residentes e negocios do centro histórico. O grupo defende que o seu movemento non busca frear un modelo de mobilidade máis sostible, senón introducir correccións que dean máis consenso á regulación e eviten, ao seu xuízo, efectos negativos sobre a actividade cotiá, o comercio tradicional e a hostalaría.
A ordenanza municipal foi presentada a comezos de febreiro e nace co obxectivo de reordenar o tráfico no casco histórico, dar preferencia ao peón, evitar aparcadoiros indebidos e controlar mellor os accesos. Entre as medidas coñecidas figuran un límite de 30 minutos para os vehículos non residentes que accedan por xestións puntuais e unha franxa de carga e descarga entre as 7.00 e as 11.00 horas, cuestións que centraron boa parte das críticas da oposición e dalgúns sectores económicos.
Na alegación rexistrada, o PP propón ampliar ata un mínimo de 60 minutos o tempo de acceso permitido para os condutores non residentes e estender o horario de carga e descarga, cando menos, ata as 14.00 horas, ademais de incorporar unha franxa vespertina controlada. Tamén pide elevar o actual límite de 3.500 quilos para determinados subministradores esenciais, reducir a dez días o prazo de resolución das solicitudes e establecer un período de carencia de seis meses no que non se impoñan sancións, co fin de facilitar unha fase pedagóxica antes da entrada plena en vigor do sistema.
Outra parte das propostas céntrase nas garantías xurídicas e no seguimento da aplicación da norma. Os populares reclaman reforzar a protección dos datos persoais e clarificar os protocolos de funcionamento das cámaras, ao tempo que apostan pola creación dunha comisión de seguimento con revisión trimestral do impacto das medidas sobre accesos, tempos de tránsito, estacionamento, sancións e actividade económica. A formación agradeceu tamén a colaboración dos establecementos que participaron na recollida de sinaturas e o apoio de colectivos como ACEBE CCA e ChesCasco, aos que atribúe un papel clave na defensa dun casco histórico 'vivo, social e comercialmente'.