Máis de 326.000 euros para renovar cinco rúas e mellorar a mobilidade en Castro Laxe
O núcleo de Castro Laxe, en Culleredo, contará cunha nova actuación para mellorar o estado das súas vías e facilitar os desprazamentos tanto de vehículos como de peóns. O Concello vén de licitar por 122.896,98 euros as obras de renovación das rúas O Tuto, Castro, Nabas e Cadaval, catro vías que dan servizo a diferentes vivendas da zona.
A intervención permitirá actuar sobre pavimentos que presentan desgaste polo paso dos anos e incorporar diferentes melloras destinadas a facilitar o tránsito e resolver problemas relacionados coa drenaxe das vías.
Os traballos contemplan a colocación dun novo firme nas catro rúas, así como a limpeza das marxes, a reapertura de cunetas e a instalación de novas tubaxes para favorecer a evacuación da auga. Tamén se renovará a sinalización horizontal e vertical e realizarase o recrecido de arquetas e pozos para adaptalos á nova configuración das vías.
Un investimento de máis de 326.000 euros na zona
Esta actuación súmase á renovación prevista na rúa Santa Bárbara, actualmente en proceso de adxudicación. Esta segunda intervención conta cun orzamento de 204.840,90 euros, polo que o investimento conxunto nas cinco vías ascenderá a máis de 327.000 euros.
A reforma de Santa Bárbara terá ademais unhas características específicas debido á proximidade da igrexa de Rutis. Na zona máis próxima ao templo está prevista a creación dunha plataforma con materiais de maior calidade, deseñada para dar prioridade aos peóns.
A actuación establecerá unha velocidade máxima de 20 quilómetros por hora e incluirá un paso de peóns. Este tratamento prolongarase tamén polas sendas peonís situadas nos extremos da rúa, mentres que a zona central manterá un pavimento de asfalto.
O proxecto tamén contempla ordenar os elementos de uso común, habilitando espazos para os colectores de residuos e incorporando novo mobiliario urbano.
Máis iluminación e drenaxe
A renovación de Santa Bárbara incluirá igualmente a substitución do actual sistema de iluminación por luminarias LED. O proxecto prevé ademais homoxeneizar a sinalización da zona e incorporar unha rede específica para a recollida de augas pluviais.
Con estas actuacións, o Concello pretende mellorar de maneira conxunta o estado das vías de Castro Laxe, tanto mediante a renovación dos pavimentos como coa incorporación de medidas destinadas á seguridade, á accesibilidade e á correcta evacuación das augas.