Máis de 260 pandeireteiras e pandeireteiros darán vida ao concurso de Xiradela
A música tradicional galega volverá soar con forza este domingo en Arteixo coa celebración do XXVI Concurso de Música Tradicional de Xiradela, unha cita xa consolidada no calendario cultural e folclórico do municipio. Máis de 260 pandeireteiras e pandeireteiros participarán nesta edición, que reunirá no auditorio do Centro Cívico Cultural a 38 grupos pertencentes a 20 agrupacións chegadas de distintos puntos de Galicia.
O certame desenvolverase en quenda de mañá e tarde. As actuacións comezarán ás 10.30 horas e prolongaranse ata arredor das 14.00, mentres que a sesión vespertina arrincará ás 16.00 e está previsto que remate sobre as 20.00 horas. A entrada será gratuíta ata completar a capacidade do espazo, e a organización tamén habilitará o seguimento en directo a través da canle de YouTube da asociación.
A convocatoria mantén as catro categorías habituais, divididas por idades, con dez grupos en cada unha das tres primeiras e oito na categoría absoluta. Nesta ocasión, a organización incrementa a dotación económica e repartirá un total de 2.900 euros en premios, ademais dos trofeos para os tres primeiros clasificados de cada nivel e un recoñecemento especial ao mellor vestiario.
Xiradela destaca tamén o ambiente que cada ano rodea o concurso, tanto dentro como fóra do auditorio, coa contorna do paseo fluvial convertida nun punto de encontro para participantes, familias e afeccionados. Antes de subir ao escenario, non faltarán os últimos arranxos do traxe tradicional, os ensaios de voz e o son das pandeiretas quentando unha xornada que volve situar a Arteixo como escaparate da música de raíz galega.
A asociación organizadora, fundada en 1982, leva décadas traballando na recuperación e difusión do folclore galego. O concurso, nacido no ano 2000, mantén o seu obxectivo inicial de fomentar a participación da mocidade, favorecer o intercambio entre escolas e contribuír á preservación da cultura tradicional.