Máis de 240.000 euros para apoiar actividades das ANPAS en centros públicos da provincia de A Coruña
A Deputación da Coruña destinará 242.337 euros a apoiar as actividades de 84 ANPAS de colexios e institutos públicos da provincia. É a primeira vez que a institución provincial activa unha convocatoria específica para estas asociacións, co obxectivo de reforzar o seu papel na comunidade educativa e aliviar a carga económica das familias.
As axudas servirán para financiar proxectos moi diversos, desde servizos de madrugadores, almorzos ou comedor ata actividades deportivas, culturais, ambientais, de reforzo educativo ou de convivencia escolar. Tamén se inclúen iniciativas relacionadas coa igualdade, a diversidade e a prevención do acoso nos centros.
Entre as entidades beneficiarias figuran ANPAS de distintos concellos da provincia. Na cidade da Coruña recibirán apoio, entre outras, a A.P.A. Xanela do CEIP María Pita, a A.P.A. Faro do CEIP Víctor López Seoane, a A.P.A. Riazor do IES Eusebio da Guarda ou a APA Agarimo do CEIP María Barbeito.
A convocatoria tamén chega a centros de diferentes municipios da provincia. Algúns exemplos son a A.P.A. De Al. A Froula do CEIP de Teixeiro, en Curtis, co proxecto ‘Tribo miúda, criando en rede’; a A.P.A. Castro Baxoi, de Miño, cunha proposta sociocultural; e a A.P.A. do CEIP de Présaras, en Vilasantar, co programa ‘Concilia e aprende Présaras’.
O presidente da Deputación, Valentín González Formoso, destacou que esta liña de axudas permite recoñecer o labor das ANPAS, que considera unha parte esencial da vida dos centros. Segundo sinalou, o obxectivo é garantir que o alumnado poida acceder a unha oferta ampla de actividades con independencia da situación económica das familias ou do concello no que viva.
A deputada de Educación e Mocidade, Yoya Neira, cualificou a convocatoria como un éxito pola resposta das entidades. Subliñou que as achegas permitirán apoiar tanto actividades de lecer como servizos básicos, especialmente no rural, ademais de proxectos que axuden ao alumnado a medrar en valores de igualdade, respecto e convivencia.