Máis de 1.500 mozos triatletas competirán esta fin de semana na Coruña nos Campionatos de España
A Coruña converterase esta fin de semana nun dos grandes centros do tríatlon español coa celebración dos Campionatos de España de Tríatlon Cadete, Xuvenil e Júnior, unha cita que reunirá a máis de 1.500 deportistas chegados de toda España. O evento incluirá tamén o Campionato de España de Remudas Mixtas de Talentos e a última xornada da Liga Talento da Federación Española de Tríatlon (FETRI).
As competicións desenvolveranse durante o sábado 20 e o domingo 21 de xuño na contorna de Marina Parrote, o porto e o centro da cidade, convertendo A Coruña nun escaparate para as novas promesas dunha disciplina que continúa medrando en participación e nivel competitivo.
A zona de baños de Marina Parrote volverá ser o escenario da natación, mentres que o segmento ciclista discorrerá polo paseo marítimo e a contorna portuaria. A carreira a pé levará aos participantes ata o Castelo de San Antón antes de regresar á meta situada na praza de María Pita, un dos puntos máis emblemáticos das competicións de tríatlon celebradas na cidade nos últimos anos.
A concelleira de Benestar Social, Participación e Igualdade, Nereida Canosa, destacou durante a presentación que a celebración destes campionatos reforza a posición da Coruña como sede habitual de grandes eventos deportivos. A edil subliñou tamén o impacto económico e turístico que supoñen este tipo de citas para a cidade, que cada ano recibe milleiros de deportistas, familiares e acompañantes.
O sábado pola tarde disputarase o Campionato de España de Tríatlon Cadete, Xuvenil e Júnior en formato SuperSprint. A competición contará con series clasificatorias desde as 16.00 horas e finais programadas para as categorías cadete, xuvenil e júnior a partir das 19.00 horas.
Xa o domingo celebrarase o Campionato de España Júnior en distancia Sprint, tanto masculina como feminina, así como o Campionato de España de Remudas Mixtas de Talentos, unha das probas máis espectaculares do programa. Cada equipo estará formado por dúas mulleres e dous homes que completarán sucesivamente un tríatlon SuperSprint ata decidir o vencedor na última remuda.
A cidade acollerá tamén unha nova parada do circuíto nacional Pho3nix Kids Triathlon Series by Javier Gómez Noya, dirixido ás categorías de base. A competición celebrarase o sábado pola mañá en Marina Parrote e permitirá a participación de nenos e nenas das categorías prebenxamín, benxamín, alevín e infantil en distancias adaptadas á súa idade.
A cita coruñesa será ademais decisiva para resolver as clasificacións das Ligas Nacionais de Tríatlon de Talentos. Na categoría feminina chega como líder o Club Deportivo Delikia, seguido do Náutico de Narón e do Cidade de Lugo Fluvial. Na masculina, o Tribarros Villafranca encabeza a clasificación provisional por diante do Delikia e do Laguna de Duero.
Coa participación de máis de 1.500 deportistas, numerosos clubs de toda España e centos de familiares e acompañantes, a competición volverá situar á Coruña como unha das referencias do tríatlon nacional e unha das sedes máis importantes do calendario da Federación Española de Tríatlon.