Los Satélites poñerán música á noite da eclipse en María Pita
A praza de María Pita acollerá o vindeiro 12 de agosto un concerto especial da orquestra Los Satélites, unha actuación que formará parte da programación de A Coruña CidadEclipse e das Festas de María Pita. A cita celebrarase tras a eclipse de Sol e terá tamén un marcado carácter de homenaxe á tradición musical coruñesa e galega.
O concerto servirá para lembrar a figura de Pucho Boedo, unha das voces máis emblemáticas da orquestra, no 40 aniversario do seu falecemento. O repertorio estará ligado á verbena galega e incluirá algunhas das cancións máis coñecidas interpretadas polo cantante coruñés, ás que poñerán voz integrantes actuais da formación e artistas convidados.
A actuación foi presentada polo concelleiro de Cultura e Turismo, Gonzalo Castro, xunto ao director musical de Los Satélites, Javier Saavedra, e os artistas José Manuel Rodríguez 'Noly' e Paco Lodeiro. Desde o Concello destacaron o valor simbólico da cita e o papel da orquestra como parte fundamental da memoria musical da cidade.
Los Satélites volverán así a un dos grandes escenarios festivos da Coruña despois da súa actuación do pasado verán na mesma praza, cando participaron nunha homenaxe a Sito Sedes. Desta vez, a súa presenza unirase ao programa especial deseñado arredor da eclipse de Sol, un dos grandes acontecementos astronómicos e culturais do ano.
A formación mantén un lugar destacado na historia da música popular galega e continúa a ser unha das poucas orquestras que conserva corpo de metais na súa estrutura. O concerto do 12 de agosto buscará reivindicar esa traxectoria e conectar varias xeracións arredor das cancións que marcaron a historia das verbenas en Galicia.