Lorenzo eleva o ton tras a retirada do Mundial e acusa a Rey de levar A Coruña 'da máxima ilusión á máxima decepción'
A retirada da candidatura da Coruña para ser sede do Mundial 2030 abriu unha nova fronte política en María Pita. Horas despois de que Inés Rey anunciase que a cidade abandona esa carreira e prioriza, xunto con Abanca e a Deputación, unha reforma integral de Riazor e da contorna deportiva, o portavoz do PP, Miguel Lorenzo, definiu a xornada como 'moi triste' para a cidade.
Nun audio difundido polos populares, Lorenzo sostén que a alcaldesa 'mentiu e enganou' á cidadanía ao alimentar durante anos a expectativa de que A Coruña sería unha das sedes do torneo. O líder da oposición asegura que o goberno local falou dun financiador privado que 'nunca apareceu' e dun proxecto que, ao seu xuízo, 'ninguén viu', polo que reclama explicacións públicas tras pasar 'da máxima ilusión á máxima decepción'.
O portavoz popular interpreta a renuncia como o fracaso do que o executivo municipal presentara como unha aposta central de cidade. Na súa crítica, Lorenzo censura que Rey reste agora importancia ao Mundial e cuestiona que o reduza a un evento puntual cando, segundo a súa versión, o vinculou durante meses á transformación urbana e ao propio mandato.
En paralelo, o BNG tamén se pronunciou sobre a retirada da candidatura. O seu portavoz no Concello, Francisco Jorquera, sostivo que a renuncia era a 'crónica dunha morte anunciada' e reprochou ao goberno local ter impulsado o proxecto sen aclarar cuestións básicas como o financiamento, o acordo co Deportivo ou as condicións reais da operación. Ademais, reclamou que a nova etapa para Riazor non repita a falta de transparencia que, ao seu xuízo, marcou todo o proceso do Mundial.
Mentres, a alcaldesa defendeu este luns que A Coruña estaba capacitada para acoller partidos, pero subliñou que as esixencias organizativas e de investimento impedían seguir adiante 'a calquera prezo'. O novo acordo con Abanca abre, segundo o anunciado polo Concello, unha etapa centrada na modernización do estadio e da cidade deportiva co apoio da Deputación.