Leite e froita no recreo para fomentar hábitos saudables entre o alumnado de Vilasantar
A delegada territorial da Xunta na Coruña, Belén do Campo, visitou o CEIP Présaras, en Vilasantar, coincidindo cun dos repartos de leite e froita fresca incluídos no programa da Consellería do Medio Rural para promover hábitos alimentarios saudables nos centros educativos.
Na visita estivo acompañada polo alcalde de Vilasantar, Fernando Pérez, e puxo en valor a boa acollida desta iniciativa entre o alumnado do centro, que participa no programa durante este curso escolar. Segundo a información trasladada pola Xunta, no CEIP Présaras recibiron 220 litros de leite ao longo de dez días desde o pasado 2 de marzo, mentres que o reparto de froita fresca comezou o 25 de maio e suma 187 quilos distribuídos tamén durante dez días, ata este venres 5 de xuño.
A convocatoria, impulsada pola Consellería do Medio Rural, conta este curso cun orzamento superior ao millón de euros para toda Galicia e está cofinanciada a través do Fondo Europeo Agrícola de Garantía. O reparto realízase mediante o Fondo Galego de Garantía Agraria, dependente da propia consellería.
Na provincia da Coruña, a segunda quenda do programa, desenvolvida entre marzo e xuño, beneficia a arredor de 54.436 alumnos de 96 centros educativos. Ao longo de toda a campaña está previsto repartir en colexios e institutos coruñeses máis de 88.000 quilos de froita e máis de 172.000 litros de leite.
A esta liña de axudas poden acollerse centros de educación infantil, primaria e secundaria, incluíndo ESO, bacharelato e formación profesional básica e de grao medio. Cada ano, máis de 80.000 estudantes galegos consumen froita e leite durante o recreo grazas a este programa.
A Xunta sinala que o obxectivo é potenciar o consumo destes produtos entre nenos, nenas e mocidade, favorecendo a adquisición de rutinas alimentarias saudables que poidan manterse no futuro.