La Oreja de Van Gogh fai vibrar a 13.000 persoas no Recorda Fest, que pecha cun récord de 23.000 espectadores
O Recorda Fest culminou a súa segunda edición cun éxito sen precedentes, reunindo 23.000 espectadores que se entregaron por completo a cada proposta musical e artística do festival. Durante a segunda xornada, celebrada o sábado, o evento rexistrou un récord absoluto de asistencia, con 12.800 persoas gozando dunha apoteósica tarde-noite no Peirao de Batería da Coruña.
O momento álxido do festival foi protagonizado por La Oreja de Van Gogh, que reuniu case 13.000 persoas para corear cada un dos seus grandes éxitos. O público entregouse por completo a temas como Rosas, onde o estribillo foi entoado a capella por miles de voces, e Puedes contar conmigo, que levou a emoción ao seu punto máximo. A cantante Leire Martínez, ademais de atreverse co galego, conectou de inmediato coa audiencia, que non deixou de acompañar a banda durante todo o seu repertorio, incluíndo temas como El último vals e 20 de enero.
A actuación da banda foi, sen dúbida, o momento máis esperado e celebrado da fin de semana, e serviu para consolidar ao Recorda Fest como un referente musical en Galicia. O ambiente de festa e a maxia que se viviu en cada intre deixaron claro que o festival vai máis aló da música, ofrecendo experiencias inesquecibles.
O sábado tamén contou coa enerxía de artistas como Fran Perea, que levou ao público a unha viaxe nostálxica a través de temas televisivos icónicos como Uno más uno son 7; o arxentino Coti, quen fixo bailar aos asistentes con clásicos como Antes que ver el sol e Nada fue un error; e Álvaro de Luna, que puxo o broche de ouro cun show vibrante cheo de bo ambiente e colaboracións especiais.
O peche da noite chegou coa sesión de DJ Nano, que prolongou a festa ata a madrugada, enchendo de enerxía o Peirao de Batería. Con esta edición, o Recorda Fest reafirma o seu éxito e promete seguir medrando, deixando os asistentes ansiosos por vivir a experiencia de 2025.