Kafka sobe ao escenario cunha nova cita teatral para público adulto de Culleredo
A programación cultural de Culleredo incorpora unha nova proposta escénica coa chegada de 'A Metamorfose', a coñecida obra de Franz Kafka, da man de Sarabela Teatro. A función celebrarase o vindeiro venres 17 ás 20.30 horas no auditorio do Edificio de Servizos Múltiples do Burgo e estará dirixida a público adulto.
A peza preséntase como unha reflexión sobre a identidade, a transformación persoal e o lugar que ocupa cada persoa no mundo, tomando como punto de partida un dos textos máis recoñecidos da literatura universal. O Concello aposta así por unha montaxe de fondo calado dentro da súa oferta cultural.
As entradas serán gratuítas, aínda que será necesario realizar reserva previa. As persoas interesadas poderán facelo chamando ao teléfono 981 665 597, en horario de 16.00 a 21.00 horas, ou acudindo ao propio Edificio de Servizos Múltiples.
A representación enmárcase na Rede Cultural da Deputación da Coruña, un programa co que Culleredo continúa achegando á veciñanza propostas de teatro e artes escénicas de acceso libre.