Juan Fariña presenta en Bergondo a súa terceira novela, 'Agosto dezaseis'
A literatura terá unha nova cita en Bergondo coa presentación de 'Agosto dezaseis', o terceiro libro de Juan Fariña. O acto, organizado polo Concello de Bergondo e a editorial Medulia, terá lugar o xoves 18 de xuño, ás 19.30 horas, en A Senra.
A presentación estará presidida pola alcaldesa, Alejandra Pérez Máquez, e permitirá achegar ao público a nova obra do autor, natural da parroquia de Santa Marta de Babío e concelleiro na corporación municipal bergondesa.
Con 'Agosto dezaseis', Fariña amplía unha traxectoria literaria iniciada con 'As Cartas de Abel', publicada en 2020, e continuada con 'O que foi', editada en 2022. A súa nova novela propón unha historia coral na que a fronteira entre personaxes protagonistas e secundarios se esvaece, xa que cada figura funciona como unha peza necesaria dentro dun relato colectivo.
A trama sitúase no barrio de A Vila durante o mes de agosto e constrúe un universo propio a partir das vivencias dun grupo heteroxéneo de persoas. As súas historias, individuais e compartidas, van debuxando un mundo alternativo ao real, no que cada experiencia achega unha nova capa á narración.
A cita servirá para coñecer de primeira man as claves desta nova publicación, así como o proceso creativo dun autor que combina a súa actividade literaria coa vida pública municipal. A presentación de 'Agosto dezaseis' súmase á programación cultural de Bergondo e reforza o papel de A Senra como espazo de encontro para a cultura local.