José Manuel Manso deixa a súa acta como concelleiro do PP de Betanzos por motivos persoais
O concelleiro do Partido Popular de Betanzos José Manuel Manso Naveira presentou a súa renuncia á acta de edil por motivos persoais, segundo informou este martes o grupo municipal popular. O seu posto na Corporación será ocupado por Ana Belén Gómez Viqueira, que concorreu nas eleccións municipais de 2023 no número 11 da candidatura encabezada por Ceci Vázquez.
Manso formou parte da lista do PP como número catro nas últimas eleccións municipais e xa exercera como concelleiro durante o anterior mandato tras resultar elixido nos comicios de 2019.
A portavoz popular, Ceci Vázquez, mostrou o seu 'absoluto respecto e comprensión' pola decisión adoptada polo edil e agradeceulle publicamente o seu 'compromiso e dedicación' durante os últimos anos. Segundo explicou, José Manuel Manso continuará colaborando co grupo municipal no que resta de mandato para contribuír ao proxecto político do Partido Popular en Betanzos.
Pola súa banda, Ana Belén Gómez Viqueira asumirá a acta de concelleira nos próximos meses. Procedente do sector da hostalaría, tamén é coñecida na cidade pola súa participación en diferentes colectivos, entre eles SOS Betanzos Hostalería e a ANPA do CEIP O Carregal.
Desde o Partido Popular sinalan que a súa incorporación permitirá reforzar o traballo do grupo municipal na recta final do mandato, cando restan menos de dez meses para as eleccións municipais previstas para maio de 2027.