Jinzi rexuvenece o grupo de focas do Aquarium Finisterrae
O Aquarium Finisterrae incorporou un novo exemplar ao seu grupo de focas. Trátase de Jinzi, un macho novo que chegará aos 5 anos no mes de xullo e que foi cedido polo Oceanogràfic de Valencia dentro dun intercambio entre ambas instalacións.
A súa chegada supón un paso importante para o acuario coruñés, xa que permite rexuvenecer un grupo cunha idade media elevada e abre a posibilidade de que as focas poidan volver criar. Jinzi pesa xa 80 quilos e, desde a súa chegada, mostrouse curioso coa súa nova contorna e sociable co resto dos exemplares.
O intercambio tamén levou a Valencia a dous machos que ata agora vivían no Aquarium Finisterrae: Fermín, de 17 anos, e Altair, de 23. Ambos se adaptaron con normalidade ao grupo do Oceanogràfic.
Na actualidade, o acuario da Coruña conta con dez focas comúns, dous machos e oito femias. Pertencen á especie Phoca vitulina, un tipo de foca que pode observarse con certa frecuencia nas costas galegas, aínda que non cría habitualmente nelas.
O último nacemento rexistrado no Aquarium Finisterrae produciuse en xullo de 2009, cando naceu Sabela. Desde entón, os estudos xenéticos realizados ao grupo desaconsellaban a reprodución, xa que os exemplares mantiñan unha relación de parentesco próxima e existía un risco elevado de endogamia.
A incorporación de Jinzi cambia ese escenario. Ao achegar nova xenética ao grupo, o Aquarium Finisterrae abre unha nova etapa para a súa colonia de focas, coa esperanza de que nun futuro poidan volver rexistrarse crías nas súas instalacións.