Isabell Seidel conquista a Bienal Internacional de Pintura Balconadas de Betanzos e Manuel Carballeira Rivas logra unha mención de honra
A artista alemá Isabell Seidel proclamouse gañadora da XVIII Bienal Internacional de Pintura Balconadas de Betanzos, un dos eventos culturais máis destacados do verán galego, que transforma cada dous anos o casco histórico da cidade nun gran museo ao aire libre. O xurado concedeulle o primeiro premio, dotado con 5.000 euros, pola obra correspondente á balconada número 47.
Entre os artistas recoñecidos nesta edición figura tamén Manuel Carballeira Rivas, pintor afincado en Valdoviño e profesor das clases municipais de pintura do Concello, que recibiu unha das tres mencións de honra concedidas polo xurado. Este recoñecemento súmase á súa traxectoria artística e docente, na que compaxina a creación plástica coa formación de novos afeccionados á pintura.
O fallo deuse a coñecer tras a reunión do xurado, que estivo presidido pola artista Isabel Pintado Palacio e integrado por María Emilia Vázquez Rozas, Carlos Pereira Martínez, Pedro Bueno Salto, Julio Luis García Rivas e Sara Pérez Bello como vogais. Daniel Loza Martínez exerceu como secretario. Antes do inicio das deliberacións, a alcaldesa de Betanzos, María Barral, recibiu aos integrantes do órgano cualificador.
Ademais do primeiro premio, o xurado concedeu dous accésits, dotados con 1.500 euros cada un, a Manuel Moreno Morales, pola balconada número 787, e a Alba Tojo Rico, pola número 53. As outras dúas mencións de honra foron para Natalia Desiree García Lema e María José Muñoz Arias.
Na súa valoración, o xurado destacou a elevada calidade das preto de cen obras presentadas ao certame, valorando aspectos como a técnica, a creatividade, a innovación, a capacidade expresiva, a orixinalidade e o valor estético das propostas.
A alcaldesa, María Barral, salientou que 'Balconadas é unha das citas culturais máis emblemáticas de Betanzos e un dos eventos que mellor representan a nosa aposta por achegar a cultura á rúa e facer do noso casco histórico un gran espazo para a creación artística'.
A rexedora tamén puxo en valor a consolidación da Bienal como unha das principais citas culturais do verán galego, destacando que atrae cada edición a numerosos visitantes entre a Feira Franca Medieval e as Festas de San Roque. Ademais, subliñou o crecente carácter internacional do certame, coa participación de artistas chegados de distintos puntos de España e doutros países.