(IN)VISUAL abre na Coruña unha nova fiestra á arte dixital inmersiva
A cultura dixital contemporánea terá este mes de maio unha nova cita de referencia na Coruña co nacemento de (IN)VISUAL, un ciclo de concertos audiovisuais inmersivos impulsado pola Deputación da Coruña. A proposta celebrarase no Coruña Estudio Inmersivo (CEI), situado na Cidade das TIC, no espazo da antiga Fábrica de Armas.
(IN)VISUAL nace coa intención de situar a provincia na vangarda da creación contemporánea, combinando música, imaxe, tecnoloxía, intelixencia artificial, arte xerativa e linguaxes dixitais en directo. A iniciativa busca tamén abrir á cidadanía un espazo tecnolóxico singular como o CEI, considerado o maior plató de produción virtual de España.
A deputada de Emprego, Industria e Medio Ambiente, Rosa Ana García, presentou este mércores o ciclo xunto ao curador musical Xulio Vázquez, de HITO Cultura & Tecnoloxía. García destacou que o CEI é un recurso público de 2.000 metros cadrados ao servizo da innovación, da cultura e da industria audiovisual, pero tamén un laboratorio no que arte e tecnoloxía poden dialogar.
O ciclo pretende ademais conectar a memoria industrial da antiga Fábrica de Armas co futuro dixital que representa a Cidade das TIC. Esta relación entre pasado e vangarda será unha das claves dunha proposta que quere transformar o espazo nun escenario para novas formas de creación artística.
As entradas son gratuítas, aínda que é necesario facer un depósito de 5 euros por tícket a través de Ataquilla, que será reembolsado automaticamente no momento de acceder ao recinto. A organización tamén porá á disposición do público un servizo de autobús con saída desde a rúa Juan Flórez, número 10, ás 19.00 horas, e regreso ao mesmo punto arredor das 21.30 horas.
Cada sesión combinará espectáculo e conversa cos artistas. A apertura de portas será ás 19.30 horas e, antes do inicio da experiencia, realizarase unha breve contextualización na Cidade das TIC. Os concertos desenvolveranse ata as 21.15 horas aproximadamente.
O CEI conta cunha nave de 2.000 metros cadrados e un plató inmersivo de 800 metros cadrados equipado con tecnoloxía de realidade virtual, aumentada e estendida. O proxecto, cofinanciado pola Deputación da Coruña e polo Goberno de España con fondos europeos Next Generation, supuxo un investimento de 9 millóns de euros.
Con esta primeira edición, (IN)VISUAL aspira a converterse nunha plataforma para a experimentación artística e tecnolóxica, ao tempo que reforza o papel da Coruña como cidade conectada coas novas prácticas culturais contemporáneas.