Invístense 196.000 euros en 78 corais, bandas e entidades de música e baile tradicional

ACoruñaXa
A Deputación financiará tamén neste exercicio con 199.500 euros o programa de axudas para o desenvolvemento de actividades das asociacións sen fins de lucro representantes dos sectores profesionais e amadores da cultura galega
Imaxe daOrquestra Xove da Sinfónica de Galicia
Imaxe daOrquestra Xove da Sinfónica de Galicia
19 abr 2024

O Boletín Oficial da Provincia da Coruña publicou este venres a concesión de subvencións de dous programas de apoio á cultura, nos que a Deputación investirá este ano preto de 400.000 euros. A institución provincial reservará unha partida de 196.035 eurso para o programa FO214/2024, de subvencións a corais polifónicas, bandas de música populares e entidades de música e baile tradicional galego e formacións musicais de grande formato da provincia da Coruña, para a realización de investimentos culturais durante o ano 2024. As axudas chegarán a 78 beneficiarios.

A Deputación aprobou tamén un orzamento de 199.424 euros para o programa FO215/2024, de subvencións para o desenvolvemento en 2024 de actividades sen fins de lucro con función de representación sectorial e colectiva a nivel galego das persoas ou entidades dos diferentes sectores profesionais e amadores da cultura galega. Neste caso, as axudas repartiranse entre 17 beneficiarios.

“Con este investimento de case 400.000 euros”, explicou a deputada de Cultura, Natividade González, “no noso departamento seguimos apostando por facilitar o traballo das entidades. Neste caso, por unha banda, no ámbito da cultura amadora nos campos da música tradicional e popular, cuxas entidades e colectivos son pezas chave na dinamización sociocultural dos nosos concellos e fan unha moi importante labor de formación musical de base, transmisión de valores culturais e cohesión social. E por outra, nun eido de importancia singular dentro do sistema cultural galego: o das entidades sen ánimo de lucro que vertebran os procesos de análise, proposición e demanda dos diferentes sectores da nosa cultura, actuando como as asociacións representativas destes na súa interlocución coa administración e no seu traballo de posta en valor e difusión social do seu campo de acción”.

Según explicou González, “a existencia deste tipo de entidades resulta non só relevante para os propios sectores, senón tamén para os propios poderes públicos, que teñen nelas axentes válidos e valiosos para a definición e contraste das políticas culturais”. “É por iso”, concluíu, “que desde esta área de Cultura consideramos precisa a existencia dunha liña de subvencións propia para elas e axeitada ás súas dinámicas e natureza”.