Invisten máis de 100.000 euros na mellora de cinco parques infantís en Miño
O Concello de Miño destinará preto de 100.000 euros para realizar melloras en cinco parques infantís do municipio, co obxectivo de ofrecer espazos seguros e modernos para o goce dos máis pequenos. As actuacións realizaranse nos parques de Callobre, Os Abellóns, o CEIP de Bemantes, a rúa Aveás e Telle, e estarán enfocadas na renovación de xogos, valados e pavimentos.
As intervencións inclúen a renovación dos xogos no parque da escola unitaria de Bemantes, cunha inversión de 30.684,67 euros; en Callobre destinaranse 28.421,10 euros para substituír o valado e os xogos; en Os Abellóns renovarase o pavimento de gravilla por un de caucho, cun custo de 19.367,39 euros; e finalmente, renovaranse os valados dos parques da rúa Aveás e de Telle, cunha inversión de 10.052,37 e 5.727,83 euros, respectivamente.
Estas melloras serán financiadas a través dunha modificación orzamentaria de 1 millón de euros, que será debatida nun pleno extraordinario este xoves, 7 de novembro, ás 14:15 horas, para reforzar as medidas de seguridade e modernizar as instalacións destinadas aos nenos e nenas do municipio.