Inés Rey pide en Valencia a inclusión dos concellos na xestión das emerxencias
A alcaldesa da Coruña e vicepresidenta da Federación Española de Municipios e Provincias (FEMP), Inés Rey, reclamou hoxe en Valencia a incorporación dos concellos na xestión das emerxencias como administracións clave para atender as necesidades da cidadanía. Durante a súa visita a algúns dos municipios afectados pola catástrofe da DINA, Rey trasladoulles aos rexedores e rexedoras o apoio da FEMP e destacou a súa incansable labor durante este período crítico.
Inés Rey subliñou que os concellos, por ser a administración máis próxima á veciñanza, teñen un coñecemento único do terreo e das necesidades reais das persoas afectadas. “Non podemos xestionar emerxencias sen contar cos alcaldes e alcaldesas, que foron o primeiro recurso da poboación nestes momentos de enorme dificultade”, afirmou. Ademais, insistiu na importancia de dotar aos municipios de ferramentas e recursos para que poidan actuar de maneira efectiva.
A alcaldesa lamentou que algúns sectores estean utilizando politicamente a traxedia da DINA, cualificando estas accións de "inmorais". “Non é o momento de facer reproches, senón de unir forzas para reconstruír os concellos afectados e atender á veciñanza, que aínda segue a sufrir as consecuencias desta catástrofe”, declarou Rey, facendo referencia á recente reprobación da alcaldesa de Paiporta.
Entre as demandas da vicepresidenta da FEMP inclúese a simplificación dos trámites administrativos para que os concellos poidan responder con maior axilidade ante situacións de emerxencia e coordinarse eficazmente coas administracións autonómicas e estatais. Tamén salientou a necesidade de aumentar o financiamento destinado ás administracións locais para mellorar a súa capacidade de resposta.
Durante a súa intervención, Rey destacou que a colaboración entre administracións é esencial para afrontar crises como a da DINA. “Temos que deixar a política partidista a un lado e centrarnos en ofrecer solucións que permitan reconstruír o que se perdeu e preparar os nosos municipios para futuras emerxencias”, explicou.
Por último, a alcaldesa aproveitou a ocasión para expresar a súa solidariedade cos veciños e veciñas afectados e agradeceu o traballo incansable dos rexedores e rexedoras, independentemente da súa cor política. “Os concellos son o corazón da reconstrución e deben ser tratados como tales”, concluíu.