Inés Rey e Francisco Jorquera selan en A Coruña uns orzamentos de 375,3 millóns de euros para 2026
A alcaldesa da Coruña, Inés Rey, e o portavoz municipal do BNG, Francisco Jorquera, presentaron este luns o pacto para sacar adiante os orzamentos municipais de 2026, que ascenden a 375,3 millóns de euros. Ambos subliñaron a capacidade de entendemento entre dúas formacións distintas e defenderon que o acordo antepón as necesidades da cidade e da veciñanza a outras consideracións políticas.
As grandes liñas das contas xa foran avanzadas a semana pasada polo goberno local. O documento reserva 58 millóns de euros para investimentos, cun peso destacado do Plan de Barrios, e incorpora un impulso ás políticas de vivenda e ás medidas de protección social. Ademais, consignaranse 7,2 millóns de euros para convenios nominativos con asociacións e entidades coruñesas.
Os orzamentos tamén contemplan dotacións para proxectos de envergadura, como a estación intermodal, a Cidade das TIC ou o Novo Chuac. Neste último caso, Rey instou á Xunta a 'axilizar esas obras e acabe cos retrasos'. Preguntada pola ausencia dunha partida específica para a reforma de Riazor e a súa contorna de cara ao Mundial 2030, a alcaldesa indicou que 'o orzamento permite que, se hai acordos con outras Administracións, poidamos adicar fondos a proxectos complexos como este no 2026'.
No apartado político, Rey cualificou a xornada como 'un bo día para a cidade' e celebrou que PSOE e BNG actuaran 'con responsabilidade e rigor' pensando nos intereses comúns. Pola súa banda, Jorquera puxo en valor que o pacto recolle as condicións de partida defendidas polos nacionalistas, entre elas non incrementar impostos, recuperar os orzamentos participativos e devolver ao pleno competencias de control sobre as contas municipais. O portavoz do BNG apelou, ademais, a unha 'política útil' baseada en acordos e centrada nas necesidades da cidadanía.