Hugo Vilariño acada a prata estatal júnior co Club Vigo Voleibol
O voleibol oleirense suma un novo éxito da man de Hugo Vilariño, que se proclamou subcampión de España júnior co Club Vigo Voleibol. O equipo galego asinou unha destacada participación no Campionato de España Júnior Masculino, celebrado en Almendralejo, onde conseguiu chegar ata a final nacional.
O conxunto vigués acadou o billete para o partido polo título tras superar nas semifinais ao Unicaja Costa de Almería por 1-3, nun encontro moi disputado que se decidiu no cuarto set por 29-31. Xa na final, o Club Vigo Voleibol caeu ante o FC Barcelona por 0-3, con parciais de 16-25, 22-25 e 21-25.
A prata confirma o gran nivel dunha xeración que colocou ao Club Vigo Voleibol como segundo mellor equipo do país na categoría. A clasificación final do torneo situou ao FC Barcelona como campión, ao Club Vigo Voleibol como subcampión e ao Cisneros La Laguna no terceiro posto.
Para Hugo Vilariño, natural de Oleiros, este resultado dá continuidade a unha tempada de forte crecemento competitivo. O xogador xa viña de proclamarse campión galego júnior e MVP do campionato autonómico, consolidándose como unha das pezas destacadas do voleibol galego de base.