Hoxe abren as inscricións para o concurso 'A Coruña Imaxina'
Desde hoxe, luns 28 de outubro, os centros educativos interesados en participar no IV Concurso "A Coruña Imaxina" poden inscribirse a través da web municipal. O prazo de inscrición permanecerá aberto ata o 22 de novembro de 2024.
Esta iniciativa, promovida polo equipo da alcaldesa Inés Rey, busca espertar a curiosidade e o compromiso dos máis novos coa ciencia e coa sociedade. A edición deste ano xira en torno ao tema 'Auga Limpa, Futuro Sostible', un enfoque que convida aos estudantes de Educación Secundaria Obrigatoria (ESO) e Bacharelato a traballar xuntos para propoñer ideas innovadoras que aborden un dos principais desafíos do noso tempo: garantir o acceso universal á auga potable e o saneamento adecuado.
O concurso está dirixido aos centros educativos públicos e concertados que pertencen á Mancomunidade de Municipios da Coruña, que inclúe os concellos de Abegondo, Arteixo, Bergondo, Cambre, Carral, Culleredo, Oleiros, Sada e a propia Coruña. Os grupos de estudantes interesados en participar poden formalizar a súa inscrición a través da plataforma educativa do Concello.
Promover a innovación a través das STEM
O concelleiro de Educación e Innovación Tecnolóxica, Juan Ignacio Borrego, sinala que “o programa A Coruña Imaxina naceu como unha iniciativa municipal pioneira, deseñada para difundir a cultura científica e tecnolóxica entre o alumnado de secundaria”. Cada ano, o concurso escolle unha temática relevante que serve de marco para que os participantes desenvolvan proxectos orixinais, empregando ferramentas de ciencia, tecnoloxía, enxeñaría e matemáticas (STEM), co fin de propoñer solucións prácticas e eficaces a retos reais da sociedade.
Ao final do proceso, aqueles proxectos que cheguen á fase finalista terán a oportunidade de presentar publicamente os seus experimentos e materiais creados. Esta presentación final é unha ocasión para que o alumnado mostre o resultado do seu traballo, poñendo en práctica as súas habilidades científicas e comunicativas.
O concurso 'A Coruña Imaxina' busca, así, formar unha nova xeración máis comprometida, consciente e preparada para os desafíos do futuro, cunha base sólida en ciencia e innovación.