Homenaxean en María Pita a usuarios de Asperga e Aspronaga polo seu traballo filatélico
No Palacio Municipal de María Pita celebrouse onte unha emotiva cerimonia de entrega de medallas e diplomas a máis de 30 persoas usuarias das asociacións Asperga e Aspronaga, que participaron no proxecto filatélico "A miña primeira colección de selos". Esta iniciativa, impulsada pola Sociedade Filatélica da Coruña en colaboración con Correos, foi financiada polo Concello da Coruña a través do programa "Cultura accesible e inclusiva" da Fundación Emalcsa, co obxectivo de fomentar a creatividade e inclusión social.
No acto estiveron presentes a concelleira de Benestar Social, Igualdade e Participación, Nereida Canosa, acompañada pola concelleira Yoya Neira, vicepresidenta da Fundación Emalcsa; o director xerente da fundación, Manuel Aguilar; o presidente da Sociedade Filatélica da Coruña, José Luis Rey, e o director da oficina de Correos, Francisco Javier Varela.
O proxecto incluíu a realización de varios talleres de filatelia nos que as persoas participantes, pertencentes a Asperga (Asociación Galega de Asperger) e Aspronaga (Asociación Pro Persoas con Discapacidade Intelectual da Provincia de A Coruña), tiveron a oportunidade de coñecer o mundo dos selos e desenvolver as súas habilidades creativas. O selo personalizado, emitido por Correos, foi deseñado pola artista coruñesa Yolanda Dorda, como unha homenaxe aos novos filatelistas participantes no proxecto.
Durante o evento, Nereida Canosa destacou a importancia de iniciativas como esta para a integración social, sinalando que "a cultura, ao igual que o deporte e a educación, abre portas á socialización e á integración comunitaria". Engadiu que a verdadeira inclusión pasa por dar visibilidade e espazo aos colectivos máis vulnerables para que poidan expresarse libremente e traballar en grupo.
A concelleira tamén fixo referencia aos avances que se están producindo en relación á inserción laboral de persoas con diversidade funcional, mencionando iniciativas como o Quiosco Down Experience e os cabaliños de Méndez Núñez, xestionados pola APEM (Asociación Pro Enfermos Mentais). Con todo, subliñou que queda traballo por facer para que proxectos deste tipo deixen de ser a excepción e se converta en norma dentro da sociedade.
Entre os homenaxeados de Aspronaga, destacaron Benjamín Barbadillo, Martín Blanco, Ana María Capelete, Pilar López, Fernando Otero, entre outros. Pola parte de Asperga, foron recoñecidos participantes como Silvia Serena Baptista, Xabier Bustamante e Patricia Vázquez, entre outros.
Este proxecto non só recoñece o talento creativo dos participantes, senón que representa un paso importante cara unha sociedade máis inclusiva, onde todos os cidadáns, independentemente das súas capacidades, teñen a oportunidade de contribuír e ser valorados polo seu traballo.