Galicia Design Week pecha a súa sétima edición consolidada como referente do deseño no noroeste peninsular
A Galicia Design Week puxo o punto final á súa sétima edición cun balance moi positivo por parte da organización, que considera que o evento “consolida” o seu papel como referencia do deseño no noroeste peninsular. Álex Rico Caramés e Marta González Rivas, codirectores do festival, puxeron en valor o papel da cita como punto de encontro entre profesionais do sector e o público xeral, reunindo figuras destacadas do panorama galego e estatal.
A dirección do festival destacou especialmente a implicación dos axentes creativos locais que contribuíron a espallar a programación pola cidade da A Coruña. Entre eles salientaron o traballo de Restory, libraría de segunda man instalada recentemente na cidade tras o seu traslado desde Barcelona e que celebrou o seu primeiro aniversario cunha participación clave nesta edición. Tamén subliñaron a colaboración do sector gastronómico local, coa presenza de COMER, Rosmon e Gracias Por Su Visita, así como o ambiente xerado polas SESSIONS, as sesións musicais protagonizadas por deseñadoras e deseñadores asistentes ao encontro.
A programación profesional volveu ser un dos grandes atractivos desta edición, coa participación de estudos e figuras de referencia como BURR, Costa, FRANKA, Grávita, Isabel Sierra, de Adobe Creative Studio, Studio Animal, Summa ou THRU. O programa incluíu 16 conferencias e 8 obradoiros especializados que rexistraron unha elevada asistencia de público.
Marta González e Álex Rico sinalaron que unha das maiores satisfaccións do festival é “poder coñecer en persoa a xente marabillosa á que admiramos” e favorecer conexións reais entre profesionais e asistentes nun ambiente informal. Ambos tamén agradeceron o apoio do equipo organizativo e das entidades colaboradoras que fixeron posible o desenvolvemento da cita.
A Galicia Design Week despediuse ata setembro de 2027, cando celebrará a súa próxima edición, aínda que varias das exposicións continúan abertas ao público. Ata o 14 de xuño poderán visitarse na Mariña as mostras Designed in Galicia, centrada no mellor deseño galego do último ano e presentada nunha instalación creada por Grupo Malasa, e #novodeseñogalego, organizada sobre unha proposta do estudio Flu-or e dedicada ao talento emerxente da comunidade.
Ademais, o espazo Studio Follow acollerá ata finais de xuño, con cita previa, as exposicións Diseño Presente. Premios ADG-Laus 2025, dedicada ao deseño gráfico contemporáneo, e outra mostra centrada no ilustrador galego Xan.
A Galicia Design Week, creada en 2021 pola axencia FOLLOW e coorganizada desde 2024 pola asociación GALICIA DESIGN, conta co apoio do Ministerio de Cultura, da Xunta de Galicia a través do Igape e da Agadic, así como do Concello da Coruña mediante o Consorcio de Turismo, ademais de numerosas entidades e empresas colaboradoras.