Freada unha das obras clave na Torre de Hércules por dúbidas sobre os permisos
A intervención de mellora posta en marcha esta semana na Torre de Hércules atopou xa o seu primeiro atranco. A Xunta confirmou a suspensión temporal do lote 3, o que afecta á zona de visitas arqueolóxicas, ao tratamento do gas radón e á mellora da accesibilidade, para revisar se a actuación conta con todas as autorizacións necesarias. Os traballos arrancaran o luns 16 coa desmontaxe da rampla de acceso e as actuacións sobre a viga perimetral do monumento.
O freo coincide coa remisión dun escrito á alcaldesa por parte de José María Bello, exxefe de Arqueoloxía da Xunta e codirector das escavacións realizadas na década de 1990. Segundo avanzou La Voz, o arqueólogo alerta dunha posible nulidade do procedemento e cuestiona que se puidese actuar sen o permiso do Estado, ao entender que o faro, ademais da súa protección patrimonial, está sometido a un réxime de convenio co Concello para o seu uso e mantemento das zonas visitables.
A obra suspendida forma parte do plan conxunto de melloras presentado a pasada semana polo Concello e a Xunta para actuar tanto na base do faro como noutros espazos da contorna. O paquete inclúe tamén a renovación da sala Giannini, a mellora da iluminación ornamental e o acondicionamento dos sendeiros do ENIL, cun investimento próximo ao millón de euros financiado en gran parte con fondos Next Generation, ao que se suma outra achega municipal para actuacións complementarias.
Desde a Xunta insisten en que se trata dunha paralización provisional mentres se realizan comprobacións administrativas e aseguran que xa están a traballar co Ministerio e co Concello para resolver a incidencia no menor prazo posible. A intención oficial é que os outros lotes do proxecto boten a andar de maneira paulatina nos próximos días, cun calendario moi condicionado pola necesidade de executar os fondos europeos antes de xuño.
O contratempo introduce agora unha nova incerteza sobre unha intervención que o goberno local presentara como esencial para mellorar a experiencia de visita, gañar accesibilidade e protexer a contorna arqueolóxica dun dos grandes símbolos patrimoniais da cidade. O que ía ser o arranque dun plan ambicioso converteuse, de momento, nunha carreira contra o reloxo e contra a burocracia.