Política | Actualidade

As exedís socialistas remiten unha carta á militancia na que falan de falta de resposta, apuntan a unha terceira denuncia e avisan de que poden aparecer máis testemuños

As exconcelleiras socialistas da Coruña Esther Fontán e Eva Martínez Acón, que presentaron denuncias internas por presunto acoso laboral contra a alcaldesa, Inés Rey, e o seu número dous no goberno local, José Manuel Lage Tuñas, deron un novo paso este luns ao dirixirse directamente á militancia do partido. Fíxoo a través dunha carta na que reprochan a ausencia dunha reacción ‘contundente’ por parte da organización e aseguran que a dirección do PSdeG non pode alegar descoñecemento porque, segundo explican, tamén recibiu copia da documentación remitida polo canal interno do PSOE.

No escrito, as asinantes ligan o seu caso co momento delicado que atravesa o socialismo en Galicia e reclaman que se aplique o mesmo nivel de rapidez que, ao seu xuízo, se viu noutras actuacións recentes do partido ante denuncias de acoso sexual. Coa Executiva federal reunida este 22 de decembro, consideran que é o momento de mover ficha.

A carta tamén menciona unha terceira denuncia que, sempre segundo a súa versión, tería presentado unha concelleira que aínda continúa en activo, e sostén que contan (din) con probas e testemuñas. Ademais, advirten de que poderían saír á luz máis relatos, incluídos os que poderían proceder de persoal municipal.

As dúas primeiras denuncias foron rexistradas a semana pasada a través do procedemento interno do partido. Segundo informacións publicadas en distintos medios, as queixas describen episodios de ‘berros, insultos, malos modos’ e un trato que cualifican de vexatorio (ademais de ‘mobbing’) durante o mandato 2019-2023.

Pola súa banda, Inés Rey negou os feitos e atribuíu as acusacións a un ‘axuste de contas’ por non repetir as denunciantes nas listas, á vez que criticou o que considera un uso indebido dun canal pensado para protexer vítimas.

A crise colleu tamén voo político. O PP coruñés reclamou de novo a dimisión de Rey e Lage e asegurou que a aparición dun terceiro caso apuntaría a un ‘modus operandi’. En paralelo, desde o PSdeG, o seu portavoz Julio Torrado pediu prudencia e advertiu contra a instrumentalización do procedemento, mantendo que a dirección autonómica non tiña ‘constancia formal’ das denuncias máis alá do publicado polos medios.