Fina Paulos e Óscar Manuel Rey presentan o 28 de decembro en Bergondo o seu libro sobre intelixencia artificial
O auditorio de A Senra, en Bergondo, acollerá o sábado 28 de decembro ás 11 horas a presentación do libro 'Intelixencia Artificial para a sociedade', escrito por Fina Paulos Lareo e Óscar Manuel Rey Calo. A obra, publicada pola editorial Medulia, analiza o potencial da intelixencia artificial como ferramenta educativa e o seu papel transformador na sociedade contemporánea.
Fina Paulos, veciña de Bergondo e unha das autoras do libro, foi recentemente seleccionada como finalista nos VIII Premios Educa Abanca, que recoñecen aos mellores docentes de España. Na categoría de secundaria e bacharelato, Paulos destaca entre os dez mellores profesores a nivel estatal, un recoñecemento ao seu compromiso coa innovación educativa.
A presentación promete ser un evento clave para reflexionar sobre os retos e as oportunidades da intelixencia artificial na educación e na vida diaria, cun enfoque centrado en dotar ás novas xeracións das competencias necesarias para o futuro.