Festa con xantar e música para homenaxear ás persoas maiores en Vilasantar
Vilasantar volverá reunir ás súas persoas maiores nunha das citas sociais máis participativas do calendario municipal. O Concello prepara para o 19 de xuño unha nova edición da festa dedicada aos veciños e veciñas de 60 anos ou máis, unha celebración pensada para compartir mesa, reencontrarse e desfrutar dunha xornada de convivencia.
O programa arrincará ás 13.00 horas cunha misa solemne na igrexa de Présaras. Despois, a partir das 14.00 horas, os asistentes participarán no xantar, que se celebrará no xardín botánico sempre que o tempo acompañe. En caso de choiva, a comida trasladarase ao pavillón de Présaras.
A proposta gastronómica contará cun menú completo no que se servirán empanada de bonito, polbo á feira e xarrete de tenreira con patacas e verduras. Como sobremesa, haberá pastel de queixo e tarta de améndoas, ademais de café con gotas, augardente da Ulla, viños tinto e branco con denominación de orixe, refrescos e auga.
A música tamén terá un papel destacado na celebración. Un dúo musical será o encargado de poñer ritmo á sobremesa e de animar unha festa que busca prolongarse máis alá do xantar, convertendo a xornada nun espazo de encontro entre veciños.
A asistencia será gratuíta para as persoas empadroadas en Vilasantar que teñan 60 anos ou máis. As persoas non empadroadas que conten con vivenda no municipio deberán aboar 20 euros, mentres que aquelas que non estean empadroadas nin teñan vivenda en Vilasantar deberán pagar 30 euros.
O Concello mantén aberto o prazo para confirmar asistencia ata o 15 de xuño. As inscricións poden formalizarse chamando aos teléfonos 981 778 169 ou 981 77 82 57. No caso das persoas que deban aboar a cota, o pagamento realizarase na conta de Abanca ES16 2080 0024 1931 1000 0012, co concepto 'Festa dos maiores 2026' e indicando nome, apelidos e DNI. O xustificante deberá entregarse no momento de anotarse.