Expertas en xénero e tecnoloxía analizan as novas violencias machistas dixitais
A Deputación da Coruña celebrou este xoves, 23 de abril, unha xornada dedicada ás novas formas de violencia machista no ámbito dixital. O encontro, desenvolvido no Museo Nacional de Ciencia e Tecnoloxía (MUNCYT), reuniu persoas expertas en xénero, comunicación, socioloxía e tecnoloxía para analizar fenómenos cada vez máis presentes nas redes e nas plataformas dixitais.
A actividade formou parte da campaña 'De Fronte', impulsada pola institución provincial para reforzar a prevención e a loita contra a violencia machista. Baixo o título 'Non deixemos que o futuro nos leve ao pasado', o programa prolongouse durante toda a xornada con conferencias, conversas e espazos de debate arredor dos novos discursos e prácticas que ameazan os dereitos das mulleres.
A deputada de Igualdade, Sol Agra, explicou que esta iniciativa naceu vencellada á conmemoración do 25N, Día da Eliminación da Violencia contra as Mulleres, pero que na actualidade se consolidou como unha estratexia comunitaria estable. Segundo sinalou, a campaña desenvólvese ao longo de todo o ano en concellos, centros educativos e entidades da provincia.
Agra advertiu tamén da preocupación da Área de Igualdade polo avance de mensaxes negacionistas e correntes reaccionarias que tentan presentar o machismo como unha elección persoal ou como un estilo de vida. Neste contexto, a xornada puxo o foco en cuestións como a manosfera, os discursos de odio contra as mulleres, a idealización da submisión feminina e o uso da intelixencia artificial para exercer ou amplificar a violencia de xénero.
O programa estruturouse en tres grandes bloques temáticos. O primeiro abordou o papel da manosfera e das plataformas dixitais na difusión de contidos misóxinos; o segundo centrouse nos retos que introduce a intelixencia artificial en relación cos dereitos fundamentais; e o terceiro analizou as novas estéticas da submisión e os procesos de radicalización que afectan especialmente á mocidade.
Ademais das intervencións de especialistas chegadas de diferentes puntos do Estado, a xornada incorporou espazos de conversa con creadoras e creadores de contido dixital e coa participación do colectivo Aventeira. O obxectivo foi abrir un diálogo plural sobre o impacto das violencias dixitais e compartir ferramentas para detectalas, combatelas e frear a súa normalización social.