Este mércores saen á venda as entradas para o ciclo Todo Público de Primavera
Este mércores, 15 de xaneiro, o Concello da Coruña pon á venda as entradas para o ciclo Todo Público de Primavera 2025, que ofrecerá cinco espectáculos destinados a nenos e nenas de 4 a 11 anos. As representacións terán lugar entre os meses de febreiro e maio no auditorio do Fórum Metropolitano.
O ciclo incluirá sesións para escolares e utilizará técnicas como monicreques, espectáculos sen palabras e clown para tratar temas como a liberdade, a soidade ou a figura da muller ao longo do tempo.
O concelleiro de Cultura e Turismo, Gonzalo Castro, destacou que "o Goberno de Inés Rey promove ano a ano unha programación cultural e de lecer de gran calidade, axeitada para todo tipo de idades e públicos, aproveitando a extensa rede de instalacións culturais das que dispoñemos".
As funcións estarán programadas para os sábados ás 18:00 horas, cun prezo de 6 euros por entrada, ou 15 euros para un abono de tres persoas. As entradas para o público en xeral estarán dispoñibles a partir das 11:00 horas deste mércores en Ataquilla e na taquilla do Fórum Metropolitano.
As sesións para escolares se realizarán os venres ás 10:00 e 12:00 horas, e as entradas para centros educativos tamén estarán dispoñibles a partir deste mércores.
Programación:
8 de febreiro: ‘A cincenta que non quería comer perdices’ de Sarabela Teatro.
8 de marzo: ‘La maestra’ de Anita Maravillas & Portal71.
22 de marzo: ‘Solo’ de Roi Borrallas.
10 de maio: ‘Moby Dick’ de Pedras de Cartón.
24 de maio: ‘Os contos do Lobicán’ de Redrum Teatro.