Sociedade

O prazo para pedir as axudas deste programa social finalizará o 8 de maio e conta cun orzamento de máis de dous millóns de euros

Este mércores 17 de abril, o Concello da Coruña abrirá o prazo para presentar as solicitudes de bolsas comedor para o vindeiro curso escolar. O programa, que conta cun orzamento de máis de dous millóns de euros, forma parte do compromiso do Goberno local coas familias da cidade que teñen máis dificultades económicas ou deben realizar un maior esforzo de conciliación.

Esta convocatoria diríxese ao alumnado empadroado no termo municipal da Coruña e matriculado en centros con 2.º ciclo de educación infantil, educación primaria, secundaria obrigatoria, bacharelato e ciclos formativos de grao medio de formación profesional e formación profesional básica.

A documentación para estas axudas poderase presentar no rexistro telemático da sede electrónica municipal ou de forma presencial nos rexistros de María Pita, Centro Sociocultural Ágora, Fórum Metropolitano, rúa da Franxa e no rexistro do Centro Cívico de Novo Mesoiro. Na web tamén se poden descargar os formularios para levar a cabo o proceso.

Todas as persoas interesadas poden recibir máis información nos centros cívicos municipais, no teléfono de atención cidadá 010 é na seguinte páxina web. Ademais realizaranse sesións informativas nos centros cívicos nas seguintes datas:

• 24 de abril, mércores, no Centro Cívico Os Mallos ás 18.00 horas.
• 25 de abril, xoves, no Centro Cívico Mesoiro ás 20.00 horas.
• 26 de abril, venres, no Centro Cívico Monte Alto ás 11.30 horas.
• 30 de abril, martes, no Centro Cívico San Diego ás 10.00 horas