Este martes comeza a segunda fase da reurbanización de San Andrés, co peche da rúa desde a praza de Pontevedra
![Imaxe da zona da San Andrés na que se acometerán as actuacións](https://acorunaxa.com/wp-content/uploads/2024/06/Imaxe-da-zona-da-San-Andres-na-que-se-acometeran-as-actuacions.jpg)
O próximo martes, 6 de agosto, arrancará a segunda fase dos traballos de reurbanización das rúas San Andrés e Sol, que implicará o peche total ao tráfico rodado entre Santa Catalina e a praza de Pontevedra.
Este proxecto, cun investimento de 3,2 millóns de euros financiado ao 50% entre o Concello e a Xunta, busca humanizar e adaptar unha das principais arterias da cidade, reforzando o seu carácter comercial. A rúa gañará espazo para a mobilidade peonil e recuperarase a súa imaxe orixinal coa plantación de máis de 80 árbores de moreira de Valdeorras, unha variedade sen froito para evitar manchas no pavimento.
A obra, que xa completou o 70% das canalizacións de fecais, pluviais, alumeado, rede eléctrica e telecomunicacións, avanzará no tramo entre Pórtico de San Andrés e Juana de Vega (praza de Pontevedra), con novas zonas verdes e mobiliario público.
Durante esta fase, o tráfico rodado será prohibido entre Juana de Vega e Santa Catalina, e inhabilitarase o punto de carga e descarga en Santa Catalina, que se trasladará provisionalmente á rúa Santa Catalina. O carril esquerdo do último treito de Juana de Vega tamén se pechará, agás para buses.
No que respecta ao transporte público, as liñas 3 e 7 modificarán o seu percorrido a partir do 6 de agosto, trasladándose a Juan Flórez e Cantón Grande. As novas paradas estarán situadas en Juan Flórez, 16, e na praza de Mina. As paradas en dirección á saída da cidade mantéñense en Juan Flórez, 10.
O Concello lanzará unha campaña informativa na rúa e nos autobuses afectados para manter á cidadanía informada sobre as novidades do proxecto. Toda a información estará dispoñible na páxina seguinte web.
A reurbanización de San Andrés e Sol ten como obxectivo recuperar a esencia de bulevar desta vía, con carrís de tres metros de ancho en formigón desactivado, barreiras vexetais e beirarrúas renovadas con novas lousas de granito. Tamén se mellorarán os servizos públicos e renovará o mobiliario urbano, incluíndo novas marquesiñas nas paradas de transporte urbano.