Espazo Común denuncia o abandono das propiedades municipais de Paderne e reclama 'un concello máis xusto'
Espazo Común Paderne denuncia o estado de abandono que, segundo a formación, presentan varias propiedades municipais do concello e reclama ao Goberno local que aplique tamén á Administración as esixencias de limpeza que traslada á veciñanza.
A formación sinala que o actual Goberno municipal está publicando bandos nos que se recollen as obrigas de limpeza das parcelas e se advirte aos propietarios da posibilidade de recibir sancións en caso de incumprimento.
Fronte a estas esixencias, Espazo Común considera que o Concello debería 'dar exemplo' e manter en condicións axeitadas os terreos e inmobles da súa titularidade. A formación denuncia que, ao seu xuízo, existen propiedades municipais 'totalmente abandonadas e sen ningún tipo de mantemento'.
Entre os puntos que sinala especialmente atópase o antigo vertedoiro municipal, que foi selado hai varios anos. Espazo Común alerta de que o estado actual da zona pode xerar problemas debido ao crecemento da vexetación.
Segundo a formación, as raíces das árbores e a presenza de maleza poderían provocar fendas na zona selada e xerar un risco de fuga de residuos.
Espazo Común reclama por este motivo unha actuación urxente para mellorar o estado das propiedades municipais e considera que o Concello debe asumir tamén as súas propias responsabilidades en materia de conservación e limpeza.
A formación remata reclamando 'un concello máis xusto cos veciños e mellor coidado', ao entender que as obrigas que se esixen aos particulares deben ir acompañadas dun adecuado mantemento dos espazos de titularidade municipal.