Deportes

José Abad e Mateo Naveira imponse na categoría 4x4 da cuarta edición da proba, que reuniu 64 equipos nun percorrido de máis de 210 quilómetros entre Carballo e Touro

O Team Coirós volveu subir ao máis alto do podio no IV Raid Clásicos del Atlas Galicia. Os veciños deste municipio coruñés José Abad e Mateo Naveira proclamáronse vencedores da categoría 4x4 na proba celebrada o pasado sábado 7 de novembro, ao volante dun Toyota RAV4 de 1996.

A parella, con Abad como piloto e Naveira como copiloto, repite así o triunfo que xa conseguira na segunda edición do raid, celebrada en 2025. Daquela competiron cun Dacia Duster e agora volveron facerse co ouro con outro vehículo, baixo o nome de Team Coirós.

A competición propón unha modalidade de regularidade fototurística na que a velocidade non determina o resultado. Os equipos deben manter os tempos establecidos ao longo do percorrido, polo que a precisión, a navegación e a coordinación entre piloto e copiloto resultan fundamentais.

A cuarta edición contou cun itinerario de 210,96 quilómetros, con saída e chegada no Circuíto Municipal de Autocrós de Carballo. O trazado incluíu 18 sectores de regularidade, que sumaron 92,48 quilómetros, distribuídos en dúas etapas: a primeira, entre Carballo e Touro, tivo 111,95 quilómetros e oito sectores; a segunda, de regreso a Carballo, completou 99,01 quilómetros e dez sectores.

64 equipos inscritos na cuarta edición

O raid continúa medrando e pasou dos 30 participantes da súa primeira convocatoria aos 64 equipos inscritos nesta edición. Na competición tomaron parte 24 equipos na categoría 4x2 e 37 na 4x4, segundo os datos facilitados pola organización.

Na categoría 4x2, a vitoria foi para Costas-Irago, do Rianxeira Team, que participou cun Fiat Uno de 1992.

O triunfo de Abad e Naveira supón un novo recoñecemento para o Team Coirós, que volve situar este municipio entre os protagonistas dunha proba de regularidade que segue gañando presenza no calendario galego.