Educación

O CEIP Portofaro e o CPR Plurilingüe Hijas de Cristo Rey foron recoñecidos pola Xunta nunha xornada na Cidade da Cultura con preto de 500 estudantes

Imaxe do Ceip Portofaro de Cambre

Dous centros de Cambre e Oleiros figuran entre os 20 proxectos científicos galardoados pola Xunta arredor da eclipse solar total do vindeiro 12 de agosto. O recoñecemento produciuse este martes na Cidade da Cultura, nun encontro que serviu para pechar a programación desenvolvida durante o curso nos Polos Creativos e no que participaron preto de 500 alumnos e alumnas de diferentes etapas educativas.

No caso de Cambre, o CEIP Portofaro recibiu o premio á mellor conxunción de tecnoloxía e creación narrativa nos Polos Creativos. Pola súa banda, o CPR Plurilingüe Hijas de Cristo Rey, de Oleiros, foi distinguido polo mellor enfoque integral dentro desta iniciativa educativa.

A xornada permitiu dar visibilidade ao traballo desenvolvido polo alumnado ao longo do curso, con propostas vinculadas á divulgación científica, á observación astronómica, á investigación e á didáctica das ciencias. Os estudantes e docentes participantes explicaron ao público visitante os experimentos, recursos e solucións tecnolóxicas creadas nos centros para achegar a eclipse á comunidade educativa.

O conselleiro de Educación, Ciencia, Universidades e Formación Profesional, Román Rodríguez, destacou durante a visita á exposición que os proxectos premiados amosan o potencial dos centros galegos e a importancia de impulsar metodoloxías nas que o alumnado sexa protagonista da súa aprendizaxe.

A cita reuniu tamén investigadores universitarios e integrantes da Axencia Espacial Escolar Galega, nunha programación pensada para preparar o gran fenómeno astronómico deste verán e para ofrecer recursos que permitan seguilo con seguridade.

O encontro concluíu co lanzamento da cápsula estratosférica MarumaSAT VIII, unha misión escolar con globos sonda que pode alcanzar os 30.000 metros de altitude e que incorpora experimentos para recoller datos e analizar as condicións da estratosfera.

A Consellería avanzou ademais que os Polos Creativos manterán a exploración espacial como eixo de traballo no curso 2026-2027, con novas propostas ligadas á robótica, á programación e ao desenvolvemento tecnolóxico.