Dous nenos de Aspace Coruña cumpren o seu soño de recibir camisetas asinadas polo Dépor
Samuel e Ismael, dous alumnos do Centro Educativo de ASPACE Coruña, viron cumprido un dos seus grandes soños: recibir camisetas asinadas polos xogadores do RC Deportivo. Este agasallo supuxo un momento inesquecible para os rapaces, que gañaron o premio tras conseguir o primeiro posto na última edición do concurso de cociña 'En ASPACE Cociñamos Xuntos'.
Organizado pola Federación ASPACE Galicia, o concurso premiou a Samuel e Ismael pola súa creativa receita “Bao Boom de muuu...”, un prato onde a tenreira é o ingrediente principal e co que conquistaron o primeiro premio. A final do concurso celebrouse en maio, e, aínda que a espera polo agasallo foi longa, pagou a pena: ambos puideron compartir a celebración co persoal do centro e cos seus compañeiros, gozando deste momento tan especial.
Desde ASPACE Coruña quixeron agradecer ao RC Deportivo este xesto e o seu apoio a Samuel e Ismael, destacando que este tipo de detalles deixan unha pegada imborrable e crean recordos que os nenos non esquecerán.