Diego Rosón proclámase subcampión do Campionato Nacional Militar de Taekwondo

O taekwondista Diego Rosón, vinculado ao club Kwon Betanzos, conseguiu a medalla de prata no VI Campionato Militar Nacional de Taekwondo, celebrado en Los Alcázares, na Rexión de Murcia. O deportista competiu representando o equipo da Garda Civil e chegou á final tras superar con autoridade os seus anteriores enfrontamentos.
Rosón tivo moi preto a medalla de ouro, pero unha penalización a falta de apenas dous segundos para o final privouno do triunfo. Malia ese desenlace, a entidade valorou moi positivamente a súa actuación, que supón unha mellora respecto ao terceiro posto acadado na edición anterior.
O campionato, disputado no Centro de Alto Rendemento da Rexión de Murcia, reuniu representantes de distintos corpos e unidades militares nunha cita que serve como referencia para a selección de deportistas que poderían participar no Mundial Militar de 2027.
Con este subcampionato, Rosón continúa na pugna por conseguir unha praza para esa competición internacional, á espera da decisión dos técnicos. Desde o Kwon Betanzos trasladáronlle os seus parabéns ao deportista polo resultado e pola súa actuación nunha cita de ámbito nacional.