Derradeiras prazas para ser figurante na Cabalgata de Reis de Culleredo
O Concello de Culleredo ofrece 50 prazas para nenos e nenas de entre 7 e 10 anos que queiran participar como figurantes na próxima Cabalgata de Reis. Aínda quedan prazas dispoñibles, e o prazo para realizar as inscricións estará aberto ata o 18 de decembro ás 24:00 horas a través da sede electrónica municipal.
Terán preferencia os menores empadroados no Concello de Culleredo. Para formalizar a inscrición, débese presentar unha instancia xenérica na sede electrónica indicando a idade, a altura e a talla do participante.
Se as solicitudes superan as prazas dispoñibles, realizarase un sorteo público o venres 20 de decembro ás 11:00 horas no Centro Municipal de Formación Pablo Picasso. A cada solicitude correctamente cuberta asignaráselle un número para o sorteo.
Unha vez asignadas as prazas, comunicaráselles ás persoas seleccionadas a información necesaria para recoller o vestiario dos figurantes. Tamén se creará unha lista de agarda para cubrir posibles baixas ou necesidades adicionais.
Para máis información, pódese contactar co servizo de dinamización local no teléfono 981 66 42 04. As bases completas da convocatoria están dispoñibles na páxina web municipal.