Denuncian actos vandálicos na ruta á Fervenza de Verís e piden respecto polo patrimonio natural
O Concello de Irixoa deu a voz de alarma nas últimas horas tras detectar actos de vandalismo na ruta que conduce á Fervenza de Verís. A través das redes sociais, o consistorio difundiu imaxes nas que se aprecia unha árbore cortada e atravesada no camiño, un obstáculo que compromete o paso e pode supor un risco para as persoas que transitan pola zona.
A incidencia afecta a un dos itinerarios naturais máis coñecidos do municipio, o que leva ás fervenzas do río Zarzo na contorna de Verís, un pequeno percorrido circular que atrae visitantes ao longo do ano.
Desde o Concello fan un chamamento á responsabilidade e ao coidado dos espazos públicos, lembrando que se trata dun enclave de interese paisaxístico e de lecer que precisa mantemento e civismo para poder ser gozado en condicións de seguridade.