Curtis supera a despoboación rural cun aumento do censo en 2024
Nun contexto de despoboación xeral no rural galego, Curtis destaca como un exemplo de crecemento demográfico. Segundo os datos recentemente publicados polo Instituto Nacional de Estadística, o censo deste concello experimentou un incremento do 1,1% en 2024, pasando de 4.135 a 4.181 habitantes.
Detrás desta tendencia positiva atópanse factores como o crecemento industrial, que está a xerar centos de postos de traballo, e as políticas municipais de apoio á conciliación e ao ámbito rural. Estas iniciativas converteron a Curtis nun lugar atractivo non só para traballar, senón tamén para vivir e formar unha familia.
A situación contrasta coa dos concellos limítrofes, onde a perda de poboación segue sendo a tónica dominante. Guitiriz (-72), Oza-Cesuras (-52), Mesía (-35), Sobrado (-23), Aranga (-16) e Vilasantar (-3) reflicten a dificultade xeral para reter habitantes na comarca. Curtis, pola súa banda, semella resistir esta tendencia grazas á súa aposta polo desenvolvemento sostible e as políticas sociais.