Eventos

A restauración de corredores ecolóxicos, a plantación de máis de 1.100 árbores e as actuacións para favorecer a biodiversidade sitúan ao municipio como referente no coidado da paisaxe

As actuacións desenvolvidas en Curtis para a conservación das sebes autóctonas e a mellora da biodiversidade foron recoñecidas pola Xunta de Galicia durante a presentación das conclusións da iniciativa A Liga das Sebes, un proxecto orientado á protección da paisaxe e á recuperación de elementos tradicionais do territorio. O director do Instituto de Estudos do Territorio (IET), Enrique de Salvador, participou na xornada, na que se puxeron en valor os resultados acadados no municipio.

O recoñecemento centrouse nas boas prácticas ambientais e paisaxísticas impulsadas en Curtis, onde se desenvolveron actuacións destinadas a recuperar as sebes tradicionais, elementos vexetais formados por árbores e arbustos que historicamente delimitaban as fincas, protexían os cultivos e servían de refuxio para numerosas especies animais.

A iniciativa forma parte do proxecto europeo GIFT, que promove accións para compatibilizar a actividade agraria coa conservación da natureza e da paisaxe. Entre as intervencións máis destacadas figura a restauración de sebes na zona de concentración parcelaria de Fisteus, considerada a maior reestruturación parcelaria realizada en Galicia. Neste espazo plantáronse xa máis de 1.100 exemplares pertencentes a 29 especies autóctonas entre árbores, arbustos e plantas trepadoras.

Segundo se explicou durante a xornada, estas plantacións contribúen á creación de corredores ecolóxicos que favorecen a conectividade entre hábitats, incrementan a biodiversidade e ofrecen protección tanto á fauna silvestre como ao gando, ademais de mellorar a integración paisaxística do territorio.

Outra das accións desenvolvidas consiste na instalación de caixas de madeira con mantillo para analizar a evolución da biodiversidade. Este sistema está a probarse en varias parcelas piloto, entre elas a de Fisteus, así como en espazos naturais da Serra do Xurés e dos Montes do Facho e Tetón. Ata o momento instaláronse un total de 28 caixas destinadas ao seguimento das especies presentes nestes ecosistemas.

Durante o acto tamén se avaliaron distintos aspectos das actuacións realizadas, como a diversidade das especies empregadas, o valor estético das intervencións, a súa integración na paisaxe e a funcionalidade ecolóxica das sebes restauradas.

No caso concreto de Curtis, o proxecto permitiu organizar máis de vinte actividades nas que participaron preto de 200 persoas, favorecendo a implicación da veciñanza na conservación do patrimonio natural e na difusión de prácticas sostibles para o coidado da contorna.