Política

O pleno municipal tamén votará a delegación de novas competencias tributarias na Deputación e unha modificación da relación de postos de traballo

O pleno do Concello de Curtis someterá a votación este xoves unha proposta para reducir case á metade a taxa pola recollida e xestión dos residuos municipais que pagan os negocios con menos de dez traballadores. A iniciativa pretende rebaixar a cota actual de 392 euros a 200 euros, co obxectivo de aliviar a carga económica das microempresas e favorecer a actividade empresarial no municipio.

A modificación da ordenanza fiscal busca adaptar o importe do recibo á dimensión dos negocios e á menor cantidade de residuos que xeran. A normativa en vigor establece diferentes tarifas para actividades como a hostalaría, os supermercados, as tendas de roupa ou os salóns de peiteado, mentres que o resto das pequenas empresas quedan incluídas no apartado xeral de "outras actividades con menos de 10 traballadores".

Co cambio proposto, o goberno local pretende reducir o impacto deste tributo sobre os pequenos negocios e contribuír a dinamizar a economía de Curtis. A rebaixa da taxa busca, así, axustar o custo do servizo á realidade das microempresas, que constitúen o colectivo ao que se dirixe a medida.

A orde do día da sesión plenaria inclúe tamén unha proposta para ampliar a delegación de competencias tributarias na Deputación. A iniciativa está relacionada coa tramitación de sancións por infraccións de tráfico e coa recadación voluntaria das multas leves derivadas do incumprimento da normativa antitabaco.

Segundo explica o Concello, nos últimos exercicios a Garda Civil notificou numerosos boletíns de denuncia por infraccións de tráfico e por consumir tabaco en espazos nos que está prohibido por lei. A xestión destes expedientes supón unha importante carga de traballo para o persoal municipal.

Para axilizar estes procedementos, o goberno local propón encomendar á Deputación a instrución dos expedientes sancionadores relacionados co tráfico. Tamén pretende delegar a recadación voluntaria das sancións leves por infraccións das leis antitabaco.

A corporación municipal abordará, ademais, unha modificación puntual da relación de postos de traballo (RPT). O obxectivo é adecuar formalmente as funcións que desempeña o persoal do Concello, dotándoas dunha base xurídica acorde co labor que realiza cada traballador.

A actualización pretende revisar os cometidos dos empregados municipais e contribuír a mellorar a eficiencia da Administración local. Segundo informa o goberno municipal, a proposta foi estudada e elaborada pola mesma empresa que redactou a relación de postos de traballo actualmente vixente e conta coa aprobación dos representantes do persoal e das organizacións sindicais.