'Culleredo Verde' propón conectar o monte Xalo e A Zapateira coa ría do Burgo a través de corredores verdes
Unha rede de corredores verdes para conectar o monte Xalo e A Zapateira coa ría do Burgo é a proposta central de 'Culleredo Verde', o proxecto presentado pola presidenta e portavoz do PP local, Izaskun García, durante a visita do eurodeputado do PPdeG Adrián Vázquez ao municipio.
A iniciativa pretende aproveitar os recursos naturais, paisaxísticos e patrimoniais de Culleredo para crear unha rede de itinerarios que facilite os desprazamentos peonís, recupere camiños tradicionais e conecte diferentes zonas do municipio. A proposta foi trasladada ao eurodeputado durante unha xornada que incluíu un percorrido polo paseo fluvial e a contorna do río Trabe, ao seu paso por Vilaboa, e unha visita á ría do Burgo.
Segundo explicou García, o proxecto non se limita á creación de novas sendas, senón que busca articular unha visión conxunta do territorio na que as zonas rurais, os núcleos urbanos e a ría estean conectados. Entre os obxectivos figura tamén a recuperación de espazos actualmente desaproveitados e a creación de novas áreas para o paseo e o lecer.
A proposta contempla diferentes actuacións. Entre elas atópanse a recuperación de camiños tradicionais e contornas de cursos fluviais, así como a posta en valor de elementos do patrimonio local como os Muíños de Acea de Ama e a Torre de Celas.
'Culleredo Verde' tamén incorpora a rexeneración da zona de Fonte da Balsa e o estudo de alternativas para reducir o efecto barreira provocado polas vías do tren na contorna de La Cros. Entre as posibilidades expostas polos populares figura o estudo de solucións que permitan mellorar a conexión entre os dous lados da infraestrutura ferroviaria.
A xornada rematou na ría do Burgo, onde García e Vázquez abordaron tamén a continuidade das actuacións de recuperación ambiental deste espazo tras o dragado executado con cofinanciamento europeo.
Durante a visita, o eurodeputado comprometeuse a explorar posibles vías de financiamento comunitario que permitan desenvolver por fases algunhas das actuacións incluídas no proxecto. Vázquez destacou a importancia de que os concellos dispoñan de proxectos definidos para poder optar ás diferentes liñas de apoio europeas.
A proposta forma parte do traballo que o PP de Culleredo asegura estar realizando para preparar unha folla de ruta de cara ao próximo mandato. García trasladoulle ao eurodeputado un documento no que se recollen diferentes proxectos e actuacións que, segundo a formación, poderían optar a financiamento europeo.
A visita tivo tamén un marcado carácter político de cara ás eleccións municipais de 2027, xa que Vázquez vinculou a capacidade para acceder a oportunidades europeas coa preparación dos futuros gobernos municipais. As referencias á candidatura de Izaskun García e á necesidade dunha alcaldesa con capacidade para desenvolver estes proxectos forman parte da valoración realizada polo eurodeputado e polo propio PP.