Culleredo reivindica as voces femininas da literatura galega co espectáculo 'Repunantas'
O auditorio do Edificio de Servizos Múltiples do Burgo acollerá este venres, 13 de novembro, o espectáculo 'Repunantas. As punkis da literatura galega: de María Balteira a Begoña Caamaño', unha proposta musical e literaria que busca recuperar e reivindicar o papel das mulleres na historia das letras galegas.
A función comezará ás 20:30 horas e estará protagonizada por Inma López Silva e Francisco Castro. A través dunha combinación de narración oral, música e literatura, o espectáculo propón unha viaxe desde as cantigas medievais ata a creación literaria contemporánea.
A iniciativa céntrase nas escritoras que desafiaron as normas sociais do seu tempo e loitaron contra os prexuízos e a subordinación impostos ás mulleres. O percorrido pretende ofrecer unha mirada diferente e reivindicativa sobre figuras femininas que contribuíron á tradición cultural galega, desde María Balteira ata Begoña Caamaño.
Dirixida ao público adulto, a representación ten unha duración aproximada de 80 minutos. A actividade forma parte da programación cultural do Concello de Culleredo e da Rede Cultural 2026 da Deputación da Coruña.
Entrada gratuíta con reserva previa
Os convites son de balde, pero é necesario reservar praza previamente. As persoas interesadas poden facelo chamando ao teléfono 981 665 597, en horario de 16:00 a 21:00 horas.
O Concello anima a veciñanza a participar nesta cita cultural que pon o foco na contribución das mulleres á literatura galega.