Culleredo reforza a Policía Local con tres novos axentes en prácticas
O Concello de Culleredo incorporará tres novos efectivos á Policía Local tras rematar o proceso selectivo de acceso libre incluído na súa Oferta Pública de Emprego. Os axentes foron nomeados funcionarios en prácticas e iniciarán en xaneiro un itinerario formativo que se prolongará durante nove meses antes de adquirir a condición de persoal de carreira.
Segundo explicou o goberno local, a preparación arrincará cunha fase de seis meses na Academia Galega de Seguridade Pública, con formación teórica e práctica, e continuará con tres meses de prácticas no propio corpo municipal. A parte teórica abrangue 900 horas e o período de prácticas suma outras 500.
O alcalde, José Ramón Rioboo, asinou os nomeamentos nun acto ao que asistiron tamén a concelleira de Recursos Humanos e Réxime Interior, Marta Figueroa, e o responsable da Policía Local de Culleredo, Fernando Vázquez. Rioboo felicitou os novos axentes por superar as probas e animounos a aproveitar o proceso formativo antes da súa incorporación definitiva ao servizo.
O Concello enmarca estas incorporacións nun plan de reforzo continuado da Policía Local. No último ano, o executivo municipal nomeou un total de sete axentes e tres oficiais, completando distintos procesos da súa oferta de emprego público. O alcalde sinalou que aumentar os recursos humanos no corpo é unha ‘prioridade’ por tratarse dun ámbito ‘esencial’ e por mor do crecemento poboacional que segue rexistrando o municipio.
O procedemento selectivo desenvolveuse a través da Xunta, ao abeiro do convenio subscrito co Concello de Culleredo.