Culleredo prepara unha gran transformación de Orro, Bregua e Boedo con 1,6 millóns de euros
O rural de Culleredo afronta unha importante renovación coa mirada posta en tres dos seus núcleos: Orro, Bregua e Boedo. O goberno local prepara un investimento de 1,6 millóns de euros para impulsar a humanización destes espazos e mellorar a seguridade, a accesibilidade e a conexión entre distintos puntos das parroquias.
A proposta, que deberá pasar polo pleno municipal, financiarase a través do POS Adicional da Deputación da Coruña e nace das necesidades trasladadas pola propia veciñanza nas reunións mantidas durante a elaboración dos proxectos.
En Orro, a actuación centrarase no núcleo histórico e permitirá crear unha rede de percorridos peonís que conectará o lavadeiro coa parada de autobús e con equipamentos como o centro social, a pista deportiva e o parque infantil. Unha nova praza xunto ao lavadeiro funcionará como punto central da renovación, con zonas verdes, árbores e mobiliario urbano. Ademais, a circulación quedará limitada a 20 quilómetros por hora para favorecer unha contorna máis segura.
En Bregua, a transformación percorrerá o principal eixo do núcleo, desde a antiga estación de tren ata o lavadeiro. A intención é converter estes espazos en lugares máis agradables para a veciñanza, con novas zonas de estancia, árbores, bancos e percorridos peonís. A antiga estación terá un novo uso como praza pública, mentres que a contorna do lavadeiro tamén será acondicionada e integrada na vida do núcleo.
Boedo tamén experimentará un cambio importante, especialmente na zona situada baixo o paso elevado do AVE. O proxecto pretende conectar dous espazos que actualmente están pouco relacionados e dar máis protagonismo aos peóns mediante novos pasos, unha senda e zonas de estancia. O lavadeiro volverá ser outro dos puntos postos en valor pola actuación.
A renovación do rural non quedará limitada a estes tres proxectos. Boedo contará tamén con novas obras de saneamento para ampliar o servizo a máis vivendas, mentres que o Concello prevé reparar a estrada que comunica este núcleo con Bregua, nun tramo que presenta un importante desgaste polo paso dos anos.