Culleredo iniciou o contrato urxente de limpeza de edificios e adxudicou o de rúas
O Concello de Culleredo pon en marcha o contrato urxente de limpeza de edificios fronte a emerxencia sanitaria declarada polo alcalde, José Ramón Rioboo, por mor do ERTE ao 100% da concesionaria do servizo, Jardincelas. Esta resolución posibilitou a realización dun contrato urxente seguindo o procedemento breve que marca a lexislación.
Este servizo de limpeza de edificios foi adxudicado a semana pasada a Tragsa. A firma subrogou ao persoal nun trámite con Jardincelas que se completou por fin o pasado mércores. Así, o servizo urxente funciona desde onte xoves.
Os centros escolares e dependencias municipais de uso cidadán foron as primeiras en recuperar a normalidade do servizo. Este prolongarase ata a adxudicación do servizo ordinario, actualmente en trámite de licitación.
A emerxencia sanitaria foi declarada polo alcalde o pasado 31 de maio. Nestas tres semanas, o Concello encargou traballos puntuais de limpeza nos puntos máis sensibles, á vez que se tramitaba coa máxima celeridade posible o contrato de urxencia agora xa vixente.
En canto ao servizo de limpeza viaria, o Concello acaba de adxudicar o contrato de urxencia á empresa Valoriza, tras a tramitación de varias ofertas por parte dos departamentos municipais. A empresa, do mesmo xeito que no caso da limpeza de edificios, subrogará aos traballadores de Jardincelas.
Mentres, o Concello executa traballos puntuais de carácter extraordinario, como a recollida de papeleiras. Así mesmo, este luns 24 levará a cabo un servizo de limpeza especial tras a noite de San Juan, nas zonas con maior concentración de celebracións.
A declaración de emerxencia sanitaria baséase na necesidade de garantir a salubridade e hixiene nas dependencias e rúas #ante a diminución que se supuxo o cesamento do servizo. O ERTE afectou, no caso de limpeza de edificios, a 21 traballadores e no caso de limpeza viaria a 14.