Culleredo garante as recepcións e visitas dos Reis Magos nun percorrido condicionado á meteoroloxía
O Concello de Culleredo mantén a súa programación para a Cabalgata de Reis o vindeiro domingo 5 de xaneiro, malia que o percorrido pode sufrir modificacións en función das condicións meteorolóxicas. Aínda así, as recepcións e visitas de Sus Maxestades están garantidas en espazos cubertos, asegurando que os máis pequenos poidan gozar desta celebración sen importar o tempo.
A Cabalgata na zona urbana sairá ás 17.00 horas desde a avenida Juan Carlos I de O Burgo, e as dúas recepcións previstas en carpas celebraranse no Pazo de Villa Melania, en Vilaboa, ás 18.00 horas, e na praza de Europa de O Burgo ás 20.00 horas.
Se o tempo o permite, o percorrido pasará por Ángel Senra, avenida de A Coruña, praza de Galicia, Ribados, Sanjurjo de Carricarte, Costa da Lonxa, avenida de Vilaboa, A Corveira, O Portádego, As Brañas, Fonteculler e Acea de Ama, finalizando na praza de Europa de O Burgo.
Desde o Concello tamén se informou que as visitas a centros sociais da zona rural están garantidas. As actividades empezarán ás 17.00 horas en O Noso Lar, e seguirán por Orro, Ledoño, Sueiro, Sésamo, Castelo e Celas, en todos os casos con animación infantil.
O alcalde de Culleredo, José Ramón Rioboo, expresou a súa esperanza de que o tempo acompañe, permitindo que a xornada se celebre “cunha gran dose de ilusión”, aínda que subliñou que a seguridade será a prioridade, e que se fará un seguimento da previsión meteorolóxica para tomar as medidas necesarias. O Concello tamén contará cun operativo especial de seguridade para garantir o bo desenvolvemento do evento.