Culleredo convoca a nova edición das 'Mañás de Campamento' para cativos no verán
O Concello de Culleredo pon en marcha, un ano máis, o programa de conciliación 'Mañás de Campamento', unha iniciativa que facilita a conciliación ás familias durante o verán. O prazo para solicitar praza neste campamento abre mañá, mércores 10 de abril, e deberá facerse a través dun formulario en liña. A iniciativa está dirixida a nenas e nenos de entre 3 e 12 anos matriculados en Educación Infantil ou Primaria nalgún dos centros de Culleredo.
As 'Mañás de Campamento' poñeranse en marcha o 25 de xuño e terminará o 30 de agosto, ofrecendo ás familias quendas de 2, 3 e 5 semanas e en diferentes datas para adaptarse dunha mellor forma ás súas necesidades. Os espazos nos que se celebrarán os campamentos urbanos serán o CEIP Vila de Rutis (para Educación Infantil) e o CEIP Sofía Casanova (para Educación Primaria).
Ofrécese, ademais do horario de actividades, que comprende de 9.00 a 14.00 horas, un servizo de xantar desde as 7.30 horas e tamén de comida, permitindo aos pequenos e pequenas permanecer nos centros ata as 16.00 horas.
As actividades están deseñadas para gozar dos xogos ao aire libre, sempre que a
climatoloxía acompañe, fomentar a convivencia e animar á interrelación entre as nenas
e nenos. Estarán adaptadas ás diferentes idades, cun enfoque activo e participativo.
A ciencia, a historia, a música, as artes plásticas e a natureza serán temáticas que se abordarán
nos diferentes talleres.
As persoas interesadas en apuntarse ou en recibir máis información poden consultar os requisitos na web municipal.
O prazo permanecerá aberto ata o domingo 21 de abril. O venres 26 dese mesmo mes darase a coñecer a lista provisional de admitidos; o prazo de reclamacións abrirase ese mesmo día e pechará o 3 de maio, para que o sorteo e a lista definitiva déanse a coñecer o 10 de maio. O prazo de matrícula abrirá tres días despois, o 13, permanecendo aberto ata o 26. Por último, haberá un prazo extraordinario de matrícula os días 4 e 5 de xuño.
A primeira tenente de alcalde e concelleira de Participación Cidadá e Deportes do Concello de Culleredo, Cristina Pardo, subliña que “ademais de facilitar a vida ás familias no período estival non lectivo, estes campamentos axudan ao desenvolvemento social e persoal dos nosos nenos e nenas, que aprenderán uns doutros, todos e todas xuntos, mentres se divirten participando nas decenas de actividades programadas”.