Culleredo concreta coa Xunta a continuación da elaboración do Plan Xeral
O Concello de Culleredo e a Dirección Xeral de Urbanismo da Xunta de Galicia mantiveron recentemente un encontro de traballo centrado na elaboración do Plan Xeral de Ordenación Municipal (PXOM). A reunión, que contou coa participación do alcalde José Ramón Rioboo, a directora xeral de Urbanismo Encarnación Rivas, e a concelleira de Urbanismo Marta Iglesias, así como co equipo redactor do PXOM e técnicos municipais, tivo como obxectivo realizar un balance do estado actual do proceso e definir os próximos pasos.
Durante o encontro, acordouse convocar en setembro a Comisión Especial do PXOM, na que estará presente a directora xeral para expor a súa valoración sobre o documento e o procedemento aos grupos municipais.
O alcalde Rioboo destacou que a directora xeral considerou moi positivo retomar a elaboración do PXOM agora que o Concello dispón de persoal no departamento de Urbanismo para avanzar no proceso. O obxectivo é aproveitar o progreso xa realizado no planeamento, conforme ás directrices da Xunta, que debe aprobar o documento de forma definitiva, e ás estipulacións dos técnicos.